بتاريخ ٢٠٠٤/٧/١٤ كنا رايحين نوصل اخوي المدرسة عنده كورس صيفي

انا واخوي العود واخوي طلال وابوي .. واحنا بالطريج تعرضنا لحادث مروري .. غبت عن الوعي لما صحيت عالم وزحمه وناس وشرطة واسعاف وانا امدد ع الارض احاول استوعب شلي صار فجاة اسمع واحد يقول حق رفيجه “قول حق الشرطي اذا عنده شي نغطي المتوفي” ناديته وقلت شنو لابس ابي اعرف منو توفى لكن كانت اجابته لالا كلمكم بخير لا تحاتي

ودوني مستشفى مبارك حطوني بغرفة بيني وبين السرير الي يمي ستاره وكان الي يمي ابوي وانا ماادري بلشوا عمامي يتوافدون واحد ورا الثاني لكن كل عم يتطمن علي ويرجع يختفي لانه ابوي توفى واهو بالمستشفى وانا ماكنت ادري والي قالوا عنه توفى بموقع الحادث هذا اخوي طلال (طلال كان عمره ١٣ سنه )

بعدها رحت مستشفى الرازي لازم يسوون لي عملية جراحية بإيدي .. ثاني يوم بلغوني عمامي بالخبر بالمفجع كانت صدمه لي اول ماسمعت بالخبر ماصدقت وبلشت عيوني تبجي كان عمري ١٦ سنه وانا الحين عمري ٣٤ والله ماكو علاج حق عوار الفقد غير انك تدعي لهم وتتصبر فقدت ابوي واخوي بيوم واحد وللحين فاقدهم والالم الاكبر اني ماقدرت احضر الدفان ولا اشوفهم قبل مثواهم الاخير

تعلمت من ابوي وايد اشياء حلوه وزينه ويصير فيني ابي اتعلم منه اكثر واكثر ابي استشيره ابي ينصحني بطريقته العفوية الغير مباشرة فقدت ضحكته فقدت نكته فقدت غشمرته فقدت هيبته

رحمة الله عليك يا يبا رحمة الله عليك ياخوي اللقا بالجنة ان شاءالله