قبل ٣ سنين و ١١ شهر بالضبط.. فقدت اغلى و اعز الناس..فقدت الغالية أمي.

امي الحبيبة.. صارعت السرطان بكل ما أوتيت من قوة..كانت اكثر انسانة صابرة و محتسبة..كانت تدري ان ربي ما يمتحن الا احسن عباده..وبالسنة الاخيرة اللي قبل وفاتها..انتكست الانتكاسة الكبيرة..اللي عورت قلوبنا فيها..امي الغالية اللي الكل شهد بقوتها.. خارت.. ضعفت.. و صارتمثل الياهل اللي يحتاج عناية ٢٤ ساعة..فقدت القدرة على المشي..و على الكلام.. بس الشي الوحيد اللي كان موجود لي اخر نفس لقطته.. اهيكلمة الحمدلله و ابتسامتها رغم المعاناة..و بالايام الاخيرة لها على هالدنيا..كنا يومياً عندها.. نبوسها ونحضنها.. ماندري متى اخر يوم بنشوفها فيه.. و بالليلة نفسها.. مسكت ايدها لمدة طويلة و قعدت اتأملها.. جني حاسة انها اخر ليلة تجمعني فيها.. و قبل ما امشي منها قربت صوب اذنها و قلتلها استودعتج الله التي لا تضيع ودائعه..و بثاني يوم بعد رجعتي من المدرسة درينا انها راحت عند الله سبحانه.. ما انسى هذا اليوم.. و تجمعالناس في بيتنا.. وويوه اختي و اخواني الصغار.. كنا صغار وانا اكبرهم ١٧ سنة بس..مرت ايام العزا ثقيلة عالقلب.. بس شنو اللي بعد العزا؟الروح اللي بالبيت طفت وماتت.. صرنا يتامى.. من غير ام..ضعنا..لأن الغالية راحت.

٣ سنين و ١١ شهر..و انا بكل سنة احتاج امي اكثر.. احتاج اشوف ويهها و ابتسامتها.. احتاج اسمع صوتها و زفتها ونصايحها.. احتاج وجودهابكل لحظة بحياتي.. و بكل مناسبة سعيدة تمر فيني.. عيوني تلتفت تدورها..و اشوفها في خيالي.. واقفة و تضحك لي و فخورة فيني..

ساعات اشوفها في ويوه خالاتي وسوالفهم و ساعات اهما يشوفونها فيني بتصرفاتي و كلامي.. و دايماً دايماً اشوفها في اغنية نوال..كانت تحبهاوايد.. و بالضبط تعبر عني و عنها.. و عن تعبها..و عن روحتها اللي كسرت قلبي و قلوب اخواني و ابوي.

يا حبايب عمري شيلوني لا تخلوني بضيق..
يا حبايب عمري وقتي مانصفني..

يما يا زخة مطر.. يما ياريحة اهلي
يما يا جنة عمر.. واغلى شي بالدنيا لي

يما قلبي ما نبض الا معاك..يما قلبي ما فرح الا معاك

يما قولي وش جرى في هالسنين..
يما خبيت الانين..يما خبيت الانين..

يما عذبني زماني..

ما دريت ما دريت..
سامحوني لو غفيت وما صحيت..و ما صحيت.