صارلي فترة مو كاتبلچ اية، امس دش علينا رمضان، و كالعادة، نفس الخرابيط، شافوه و مستحيل يشوفونه و فلكيا مايجوز، نفس قطات كل سنة بالانستاقرام، نفس نكت كل سنة بتوتر، ماكو شي يديد… رحنا بيتنا انا و دلول و صلوح، بابا و ماما يتناجرون بالمطبخ، ابوي الا بيسوي بيضتين مفيوحين هالسنة بدال بيضة، يقول قاري بالوتساب انه مفيد. و ماما من كثر ما مخها مو معاها حرقت المطبخ البراني بس اشوة ماصار فيها شي، الحمدلله انه احترق الصراحة. الحين يضطرون ياخذون چولة و ثلاجات يديدة حقه.

المهم، قعدنا عالفطور، بابا يحن على دلول انه تاكل مايجوز تأخر فطورها، و ان احنا ليلحين باجي لنا وقت اهم اذن عندهم، كل شي نفس كل سنة، بس كرسيچ فاضي، مكانچ كان حيل باين عالطاولة. كليت سبرنگ رول ماما الي كنا نتسابق عليه، و المسكينة تسوي وايد على بالها بيخلص و ما يخلص، صلوح نقنق بچم كبه بعدين قطهم عالارض، مريم قالت مقولتها مالت كل سنة، انا لا اشرب شوربة ولا تشريب، لاتسوين وايد محد ياكل، كلينا، قعدنا، سكتنا، خلصنا الفطور و رحنا الصالة.

مريم سوت نفسها بتصلي و ما قعدت معانا، وايد كان صعب امسك بچيتي، اشوف امي تطالع التلفزيون وهو مسكر و ساكته، كلنا كنا نفكر نفس الشي، بس محد قاله، كلنا ندري ان هالحزة كنتو تقعدون انتي و مريم تنقون شنو المسلسلات الي بتعطونها فرصة هالسة و تقررون شنو تشوفون و متى، عشان چذي مريم كانت تتفادى تيي تقعد معانا.

طاف الوقت، و صلوح بدا يسوي حركات النوم، شلنا قشنا عشان نروح البيت، هالحزة خالاتي بدو ايون، وانا قاعد ايمّع اغراض صلوح ولا اشوف امي معلقة لوحتچ القبيحة الي رسمتيها قبل وفاتچ بشهر و يومين، سوري ايو بس راح احطها هني ابي الناس تشوفها، وايد خايسة صج 🙁 بس ماتدرين شكثر احبها، والله انها عندي احلى من اي رسمة انرسمت بدون مبالغة. ادري انها خايسة، بس ادري ان ماكو احلى منها. ولاحظت الساعة الرملية الي فيها، علوي قالت لي حزتها وامس تأكدت مرة ثانية، چنچ قاعدة تقولين لنا انه خلاص، ترا قاعد يخلص وقتي معاكم، قلتيها بسكات، و رحتي بسكات.

رحتي و خليتينا ما ندري شنو نتذجر و شنو ننسى، صج انه ما كان لنا اي عادات نسويها مع بعض كعائلة، او انا اسويها معاكم بالتحديد برمضان، غير اني كنت ادش و اخرب عليكم المسلسلات، لكن ماعتقد هالشي بيصير هالسنة. مريم ماتبي تشوف مسلسلات تقول، امي وابوي مبلشين ختمات مبچر هالسنة، انا و دلول كالعادة ماعندنا شي نشوفه، و هاسنة بوصلوح مو مقصر قاعد ينام و ينومها مبچر الله يحفظه

بس صج رمضان ليلحين خايس، باصج، ناقصه شي… ناقصه انتي 🙁 الله يعين قلب امي وابوي، و الله يعين مريوم هالشهر….

احبچ اية