حبيبتي اية، ما اذكر انه مر علي عيد ميلاد من غير ما المچ فيه و اقول لچ العمر كله، ماكنت حاسب حساب ان كل هالعمر كان بيوقف هني. اليوم المفروض تكملين ٣٣، كنا بنسوي لچ عيد ميلاد من غير ماتدرين، وانا كنت بخرب المفاجأة كل عالدة وتطنقرين علي، تالي اعطيچ هديتچ و اقول لچ عادي اذا تبين تبدلينها، ماراح ازعل، و لما تبدلينها اطنقر و اسوي نفسي عادي، كل سنة كنا نطلب كيكة وننطر تحلطم خالاتي ان الكيكة كانت ناشفة ولا امي تقول حرام هالكثر كيك الفقارة مو لاقين. الله يسامحچ ما عطيتي مجال حق صلوح يحتفل معاچ اب عيد ميلادات اكثر، اييبلچ هدية، يقول لچ كل عام وانتي بخير
والله العظيم ماتدرين شكثر صعب علي اقعد من النوم وانا ادري ان كابوسي بيبدا حزتها، اليوم بشوي اصعب من الايام الي طافت، لانه يوم يهمچ بالعادة. مشتاق وايد، ولهان وايد، و كل عام بتبقين بقلوبنا كلنا، غصة، بس حلوة.
اي صج، بيتنا صاير يضحّك شوي، لما احد فينا يشوفچ بالحلم كمية الوناسة الي تحوشنا غبية، ما تنفهم، نبچي و نضحك، الي يقول شكانت لابسة، الي يقول شلون كانت قاعدة و كل احد يفسر الحلم على كيفه، المهم، هالسنة انتي عطينا هدية، تعالي لنا بالحلم، ونسينا
صح ان هالسنة ماكو حفلة، بس بحتفل فيچ بقلبي كل يوم :*
احبچ اية
14 responses to “كل عام وانتي بقلبي”
.
في حديث عن الرسول صلى الله عليه وسلم ان أعمار أهل الجنة 33 سنة
ربك يحبها يبيها تكمل ال33 سنة عنده بالجنة
الله يرحمها ويغمد روحها الجنة والله يصبركم
أحبج آيه.
أول ما توفى أبوي توقعت الدنيا راح تنتهي أو بالأصح أنا كنت أبيها تنتهي، كنت مصدومة إن الحياة ردت طبيعية، الشمس قاعدة تشرق كل يوم الشارع ليلحين زحمة الناس قاعدة تروح دوامات الدنيا ماشية وأنا أبوي مو فيها ما كنت قادرة أتقبل ولا كان عندي الرغبة إني أتقبل، كنت أظن إن لو كملت أعيش طبيعية راح أعتبر خاينة أو أعتبر ما أحب أبوي كنت عايشة بدوامة مادري شنو أسوي أبوي اختفى من الحياة لا صوته ولا حسه بالبيت ولا لمسة ايده الحنونة فقدت طبطبته على ظهري فقدت لما يقول عفية بنتي، طول عمري كنت أخاف أفقد أبوي ولما توفى صرت أخاف أنساه. صار على وفاة أبوي تسع سنين الشوق وايد زاد، الاحتياج حقه وايد زاد،الحنين زاد، الا ذكرياتي وياي أبوي ما زادت ويمكن نقصت أكيد أشياء انمسحت من ذاكرتي. العزاء الوحيد إن الدنيا دار فناء راح تخلص الدنيا مسألة وقت بس ونلتقي إن شاءالله. راح نلتقي ان شاءالله بالجنة وكل شي راح يتصلح راح ننسى انه فقدنا وتألمنا واشتقنا. فكر دايماً بأول لقاء شلون راح يكون وشلون تكون اللمة من قلب وتطول. احزن كثر ماتبي بس لا تطول علشان أهلك اللي يحبونك تقويهم وتقوي نفسك. ما أعرف أواسي أحد فاقد أو مشتاق الصراحة غير بجملة الدنيا دار فناء.
ولا انا لطيفة. وايد صعب والله. الله يصبركم
الله يرحمج ايه ، انشالله عيدج بالجنه احلى .. احبج وايد احبج
كلنا والله.
السنة اللي طافت هالحزة ولدت وياني آدم💙 ولما نزلت بوست بالانستغرام علقت عليه حبيبتي آية رحمة الله على روحها وباركتلي واستانست إن معاها بنفس يوم ميلادها💔 ألف رحمة ونور على روحج الطيبة حبيبتي .. عيدج بالجنة أجمل ان شاءالله
الله يحفظ ادم و يطول باعماركم كلكم
و الله عيني دمعت لمن قريت كلامك تذكرت امي و ابوي الله يرحمهم كانوا احن الناس عندي ما اتذكر امي عصبت علي حتن لمن اتغشمر وياها ابوي كان صديق اكثر من اب اتغشمر وياه اتناقش وياه حتن الجدال القوي اتجادل وياه علمني شلون اكون ديمقراطي وصديق ويا عيالي . الحين راحوا بقت بس الذاكرة وحتن الذاكرة قلت للاسف هذا البني ادم الشخص العزيز لمن يروح السنين تبدي تمحيه يصير مثل السراب اخر شى اتشوف بس ظلاله و اي شخص يتكلم عن شخص عزيز توه فقده ترجع ذاكرتك على الي فقدهم من الاعزاء ونعيش بهالدوامه الكريه
عسى الله يغمدهم بجناته، حبيبي عصام مشكور
لا خيرَ بعدكِ في الحياة وإنّما أبكي مخافة أن تطول حياتي ..
عقب وفاة شخص عزيز راح تحرق قلبك كل مناسبة تمر عليك في السنة الأولى، ضحكته بيوم ميلاده .. مكانه عالسفرة بشهر رمضان .. كشخته بالعيد .. راح تذكره بوايد مواقف وبسبب وبدون سبب .. بابتسامة وبدمعه .. راح تشتاق تنادي اسمه .. وتشتاق اكثر تسمع جوابه .. راح تتخيله بمناسبات وايد وتتخيل ردود افعاله .. راح تسوي كل شي يحبه وتطالع صوره اللي تارسه البيت وتحاچيه .. راح تحس بروحه معاك تطبطب عليك .. راح تقوى عشانه وتكمل مشواره بدون لا تحس .. راح تغمض عينك كل يوم وانت تتمنى تحلم فيه .. وراح تصحى وتحس الدنيا ناقصه .. وايد ناقصه وفارغه بس غصباً عليك تكملها .. راح تتخيل وايد اللحظة اللي ربك يجمعكم فيها .. والسوالف اللي خاشها له بقلبك .. راح تفكر شلون تحضنه وتشمه وتبوس كل شبر فيه .. وراح تطل تكلمه بينك وبين نفسك وايد .. وراح يكون هو نقطة ضعفك وقوتك بنفس الوقت .. وراح تصغر الدنيا بعينك وايد وايد .. بس عشانه راح تحاول تكمل بأفضل معطياتك، عشان توصل لمنزلته وتلتقي فيه بالآخرة
آسفة للإطالة، بس امس عيد ميلاد أمي حبيبتي، هذي تاسع سنة تمر عليي من راحت وخلتني، قريت كلامك عن آية الله يرحمها وحسيت بنفس الغصة والحرقة
الف رحمه على ارواحهم الطاهرة والله يصيرنا على فراقهم ويجمعنا فيهم بجنته
الله يرحم والدتچ و يغمد روحها الجنة يارب
من أول ما تعرفت عليها 😭 ما كانت عادية ! كانت اخت ! واصلة و حبيبة و حسنة المعشر أسأل الله يجعل ما أصابها كفارة لها و يجمعنا ربي فيها في مقعد صدق عند مليك مقتدر 🙏🏻 عسى الله يشرح صدوركم و يصبركم على ما أصابكم😔