قوة… اليو بنكون فاقدينچ حق ٦٠ يوم، ما كنت ادري شكثر ممكن تتغير اشياء بشهرين بس ايوتة، بس وايد شغلات تغيرت و هم وايد اشياء تمت على وضعها. مثلا، صويلح بدا يتكلم، قام يركب جمل بيسطة، يقول ابي ، ينادي مريم ميمي، امس بچاني بالليل الكلب! قبل لا ينام بروحه قام يقول اية، مادري شطرى عليه بس قعد يقولها يمكن ٣٠ ثانية متواصلة. مع كل مرة يعيد الاسم، يصير صداه اعلى داخلي.ث… هذا واحد من الاشياء الي تغيرت، بس امي ليلحين ما طلع صوتها، اشتقت له الصراحة… لي اليوم تساسرنا مع انها راحت الطبيب، بس ماكو فايدة…

اول امس رحت مركز سلطان البحر چان اشوف صبي صغير قاعد يعلم اخته شلون تسوق قاري، و يركض يمها يداريها لاتطيح… طالعته، دمعت عيني، چان اركب السيارة قلت بيقولون شفيه هذا بو لحية شكله چنه پيدوفايل! بس ذكرت يوم اعلمچ تسوقين قاري بكندا… بفريجنا بالوست ايلاند، اذكر ذاك الصيف كان حر اكثر من العادة، و بيت سايمن جارنا كانو مسوين عصير ليمون، و قلت لچ اذا قدرتي تروحين لي اخر الشارع وتردين اشتريلچ ليمون… ترا ماكانو يبيعون، قلت حق ام سايمن ابي قلاص وسويت نفسي اشتريلچ يعني اخو مسؤول عن كلمته، بس نفس الصبي الي بسوق شرق كنت احاتي ان اتطيحين و تتعورين، بعدين قعدت اذكر ايام الرول بليد لما علمتچ بالخيران، بس ماكنت اخليچ تطلعين معانا لانه يخرع الوضع، و ادري كنتي تزعلين لما هالة كانت تيي، بس صج كانت احسن منچ الصراحة، انتي لما كنتي تلبسين كعب و تطلعين كنت احاتي احسچ مو ثابتة ١٠٠٪؜…

عموما، هذا كله صار كلام بالماضي، شي نذكره و نستذكره، نبچي شوي، نبتسم عقبها، نمسح الدمعتين الي نزلو و نسوي نفسنا نكمل چنه كل شي طبيعي. مافي شي طبيعي الصراحة… تذكرين شكثر كنت تكرهين المجاملة؟ تخيلي اية الحين من اول ما اطلع من البيت لازم اجامل لين ارد بالليل… قاعد احس كل يومي تمثيل، امثل اني عادي ماكو شي والوضع طبيعي، اتطنز، و انكت، واقول و اسولف… بس احس كل الي اسويه تمثيل، مو صج. مادري اذا الناس تلاحظ ولا لا. بس انا احس چذي، حتى مريمو و دلول، حتى امي و ابوي. احس كل واحد قاعد يخش شغلات و يبالغ اب شغلات بس عشان نحسس بعض ان كل شي اوكي! تخيلي، شهرين، ستين يوم! الف و اربعمية و اربعين ساعة كل دقيقة منهم تعوّر غير، كل ثانية صعبة… فراقچ مو هيّن حبيبتي… بس شنو نقدر نسوي؟

احبچ اية