بالويم عالاقل ولو لمرة وحدة، اصادف انسان يسألني واحد من هالاسالة: “ليلحينك لابس اسود؟ ترا عندنا عيب الرياييل مايلبسون اسود” او”ترا كلنا ماشين بهالدرب، انا يمكن زعلت اسبوع اسبوعين بالكثير من يوم توفى المرحوم/مرحومة (ضع صلة القرابة المناسبة للجملة)” او “ها شلونك؟ ماشالله شكلك صرت احسن!” مافي جواب محدد حق هالاسئلة، تبتسم ممكن، تطالعه وتنزره اذا تمون عليه هم ممكن، بس ماتقدر تجاوب على احد منهم، كل سؤال له مليار اجابة حتى لو اخزلتهم اب “اي اولا” ال “اي” لها الف معنى واللا كذلك.

من اقرب الناس علي على بالهم اني حاقرهم او مو قاعد ادخلهم داخل معاي، مايدرون ان مكاني وايد خايس، مايكفي احد ثاني، صج انه وايد وسيع و موحش، بس صج ما يكفي… مافي مجال الواحد يتنفس داخل، بتدش شتشوف؟ ليش تبي تكون جزئ من هالشي؟ تبي تشارك بالحزن؟ شارك، تبي تساعد، جرب، مو لازم اييبك معاي و اوريك، مو لازم احد يشوف هالمكان… اول الايام كان يخوفني هالمكان، بس الي قاعد يخوفني الحين اكثر اني قاعد اتعود عليه، قمت اتعود على شعور القمتة لي درجة اني قاعد احس اني قاعد اقمت الي دار مداري، امس مثلا، امي قاعدة تقول لي، اليهال ماشالله يبون يكبرون بسرعة، لا شعوريا طالعته و قلت له بابا مو لازم تكبر، ماكو شي حلو ناطرك، ليش مستعيل؟ ماحسيت بنفسي يوم قلتها، ماكنت ادري اني قلتها اصلا…الكل سكت، امي سوت نفسها مشغولة بالتلفون، و ادري انها مو مشغولة، ادري انها فاهمة الي قلته، متأكد ان دلول زعلت، زعلت مني و علي، مابطلت الموضوع بعدين بس ادري سمعت و سكتت.

مادري شلون بصير احسن؟ احسن من شنو يعني؟ شنو البنش مارك مال “احسن” احسن من امس؟ احسن من اول يوم دفنت فيه اختي؟ احسن من اليوم الي عرف ان فيها ستيج فور ادينو كارسينوما مع متس بكل مكان؟ المشكلة ان التلفزيون يصور لنا السرطان بايب بالخشم، و راس مجرد من الشعر و عيون شاحبة لا تطيق الحياة، ممكن يكون هذا الشي بالفعل للبعض. الواقع غير، السرطان رحلة مخيفة وايد للمريض و من معه، صج ان ماكان هالشي مع اية، كانت قوية، حلوة، و تبي تكمل لي اخر ايامها. السرطان رحلة خوف الكل يعيشها من اول ما يشوف الدكتور التحاليل و يعطي الي مع المريض نظرة، نظرة الي انشالله اكون غلطان، بس ادري مو غلطان، كل ثانية فيه تخرع! كل لفة فيها اعصاب و مشاعر و امل و الم. ايامها كنت ازور المكان عشان اذا فقدتها للابد، ادل دربي، الحين صار خوفي واقع من هذاك اليوم وانا اتردد على هالمغارة، لين صار لي فيها عنوان.

احسن من شنو؟ وايد ناس قالو لي، مافي شي يعدل الموضوع غير الوقت… ممكن هالكلام صج، لكن ما اعتقد يعدله، اليوم صار لچ ٧٩ يوم تحت الرمل، بصليبيخات. مادري شلون الوقت بيعدل هالشي؟ قاعد افقدچ كل يوم اكثر من الي قبله، بس قاعد اتعود على هالشعور، ممكن هذا المقصود “بان الوقت يعدل”؟ مادري؟ يصير موقف اذكر نكتة سخيفة بينّا، اقولها، ما اسمع الجواب الي متعود اسمعه منچ، اتأكد انچ مو موجودة، ترد الغصة، و اكمل عادي، چنه مو صاير شي، چني صرت احسن الحين و امشي الامور

احبچ آية