قعدت من النوم على غير العادة، صارلي فترة مو باچي بنومي، اليوم قعدت، او بالاحرى صويلح صكني اب بطل ماي على راسي و قعدني، بس قمت مخنوق حدي، شعور ثقيل على صدري مو مخليني اقدر ارد انام… طلعت معاه الصالة، شغلت له بلپي و سويت له سندويچة رهشلا و موز… يحبهم اهو. و ادري انه يحبهم. و قعدت اطالع معاه و دموعي مو راضية توقف… ما فهمت ليش؟ شفيني اليوم؟
مادري شنو الروتين الي دلول تسويه معاه كل يوم الصبح، بس انا اخترت هذا لانه الاسهل، ما يحتاي افكر. شغل تلفزيون، عطه اكل مو وايد مفيد بس ادري انه يحبه و خله يلهى، وانت غوص بمكانك… اول الايام كنت اعد روحي حزين، قاعد بوسط مستنقع ضيم و قلق، بس الحين كل مالي و استوعب اني دشيت وايد داخل… دخلت بحر عود كله درادير، اطلع منها شوي و ترد تسحبني تحت شوي. الناس الي دار مداري على بالها اني واعي بالي قاعد اسويه، انا مو قاعد اسوي شي! الاشياء اهي الي قاعدة تصير. مرة وحدة تييني موجة تسحبني لي نص البحر وتقطني بدوامة ماعرف اولها من تاليها. مالها وقت محدد، وانا اسوق، بالشاور، بنص الشغل، وانا اطبخ، مع ربعي، ولدي دلول… مافي توقيت محدد لها.
مع اني واعي بهالشي و ادري وين بتوديني الموجة، لكن اليوم كان غير… دموعي كانت غريبة اية، و ما عرفت ليش الا لما طليت بالتلفون، و طاحت عيني على الرقم الي بالكالندر. 17، وقفت الدموع، و فهمت… الغريب ، اية، ان ي كلش ماكنت حاط اب بالي هالشي، يعني مو الي قاعد ازهب نفسي ان بعد چم يوم بيكون ١٧ الشهر، او حاط اب بالي ان يوم ١٧ ثقيل راح يكون، مع اني كنت اسوي هالشي قبل. كنت مزهب نفسي مثلا قبل عيد ميلادچ اني راح ازعل وايد. هالمرة كلش لا، ولا مر بخيالي اصلا، بس كل شي فيني قاعد يحسب وانا مو حاط اب بالي. اليوم صارلچ هادتنا ٤ اشهر… انا خبري الساعة البايولوجية تشتغل ٢٤ ساعة بس، شكلها الي عندي غيرت تواقيتها.
الحياة قاعدة تمشي، بسهولتها و بصعوبتها قاعدة تمشي، الحمدلله ان صوت امي قام يرجع شوي شوي، صج كنت ولهان عليه، و ابوي رد يسوي سوالفه المعتادة شوي، قام يطلع يشتري رقي من الشارع علبو انه الذ. مع انه يدري ان البياع شاريه من الجمعية اتوقع. و صج نفسياتهم وايد تغيرت لما سافرو، اتمنى نلقى درب كلنا نتعايش فيه مع الحزن بس يكون اهون من چذي.
بس اهم شي ان قاعدين نرد شوي شوي…
احبچ اية